دوّخـيـنـي يـا لـمـونـة دوّخـيـنـي

اتعودت أمد.. يعني امشي بسرعة.. خطوات واسعة كبيرة زي ما اكون بقيس طول الشوارع.. أصلي أنا دايما متأخرة مستعجلة.
اتعودت أمد.. حتى لو رايحة ف معادي، معايا صحابي، رايحة مشوار مالوش علاقة بمواعيد وساعات وتأخير.. اتعودت أمد.

خطواتي السريعة محتاجة لشوراع واسعة وناس متفهمة لحركتي.. لكن عندي مع الناس الصبح مشكلة..

حركة الـ swing هي مشكلتي! دي حركة شفتها في فيلم، كانوا يقصدوا بيها تحريك الإيدين (رايحة - جاية) بطريقة معينة في رقصاتهم.. بصوا عليها هنا:

http://www.pond5.com/stock-footage/119160/walking-people-silhouette-pedestrian.html

كان لازم أطلق الاسم ده على مشكلتي مع البشر الصبح وانا مستعجلة.. الحركة التلقائية لليدين واحنا ماشيين..

والناس فيها أنواع: ناس مش بتحرك إيديها وشكل مشيتها زي الانسان الآلي..وناس محاسبة شوية فبتحركها بشكل خفيف..وناس عايشة دور المارش العسكري فإديها طالعة نازلة بسرعة وبشكل رأسي عجيب.. وناس إيديها عاملة زاوية حادة أقرب للقائمة (90 درجة) وأحيانا بتبقى مقــّوسة زي ما تكون رايحة خناقة.

اختلف المصريون في تسمية حركة اليدين أثناء المشي أو وصف الشخص بيها إنه: (ماشي بيعـوّم) مثلاً أو ماشي كإنه (بيأد ّف) وساعات (بيشو ّح) أو (بيطو ّح) أو (بيضبـّش) وغيرها.
كل ده أنا ماليش دعوة بيه.. أنا مشكلتي في اكتشافي إن الشعب المصري دايما متأخر على أشغاله ومواعيده ومحاضراته ومدارسه.. وكل ما زادت رغبته في الوصول بدري كل ما زادت سرعته وبالتالي سرعة وقوة حركة إيده.. فلابد من طريقة لتفاديها.

أحياناً أتحرك بسرعة بين الناس كإني في لعبة فيديو جيم (يمين شمال - يمين شمال) بسرعة من غير ما أخبط في حد.. وساعات كإني في مطاردة وضرب رصاص وحدف طوب فألاقيني بتحرك أفقياً ورأسياً بالجذع والرأس والانحناء والركض..

وساعات ابص على إديهم فيخيل إليّ إني طرازان وابقى عايزة امسك في إيد منهم واتنقل من إيد لإيد لحد ما اوصل المكان اللي هروحه..

وساعات كتيرة على سلم مترو (جيزة - شبرا) من أعداد الناس الرهيبة أبقى عايزة أرمي نفسي عليهم يوصلوني وانا على أكتافهم سالمة لعربية السيدات! (لو فاكرين إعلان ماندولين: روحلها روحلها)

قطــّعت النت بحثا وعرفت ان اللي بنعمله ده طاقة بتطلع في الحركة دي،، وانها حركة إيجابية لإن الشخص لما بيثبت إيد واحدة أثناء المشي، بيحتاج لزيادة في الطاقة المبذولة بنسبة 12 في المائة، بالمقارنة مع وضعه لما بيأرجح الإيدين مع بعض. الحركة البندولية دي بتساعد على ضبط الحركة العلوية والسفلية في عملية المشي. وكلام كتير ملعبك مشبك تقدروا تقروه بنفسكم هنا:
http://www.aleqt.com/2009/07/31/article_257861.html#

إلى هنا انتهى الكلام.. استأذنكم عندي مشوار ومتأخرة ولازم انزل بسرعة عشان الحق العب مع الناس فتحي يا وردة قفلي يا وردة.. ما ده اللي ناقص!!